दहावी आणि बारावीच्या परीक्षांच्या तारखा जाहीर

दहावी आणि बारावीच्या परीक्षांच्या तारखा जाहीर

अनिल मगदूम - वेदगंगा वार्ता                                सावंतवाडी ता. 14

महाराष्ट्र राज्य माध्यमिक व उच्च माध्यमिक शिक्षण मंडळाच्या वतीने पुणे, नागपूर, छत्रपती संभाजीनगर, मुंबई, कोल्हापूर, अमरावती, नाशिक, लातूर व कोकण या नऊ विभागीय मंडळामार्फत घेण्यात येणारी उच्च माध्यमिक प्रमाणपत्र इयत्ता 12 वी व माध्यमिक शालांत प्रमाणपत्र इयत्ता 10 वी बोर्ड परीक्षांच्या नियोजित तारखा जाहीर करण्यात आल्या आहेत. वेळापत्रकानुसार इयत्ता 12 वीच्या परीक्षा 11 फेब्रुवारी ते 18 मार्च 2025 या कालावधीत होणार आहेत. तर इयत्ता 10 वीच्या परीक्षा 21 फेब्रुवारी ते 17 मार्च 2025 रोजी होणार आहेत. 

विद्यार्थ्यांच्या पुढील शैक्षणिक वर्षाची प्रवेश प्रक्रिया वेळेवर होणे, व्यावसायिक अभ्यासक्रमाच्या प्रवेश परीक्षा या मंडळाच्या परीक्षेनंतर आयोजित केल्या जात असल्याने अशा परीक्षांचा अभ्यास करण्यास विद्यार्थ्यांना पुरेसा वेळ मिळावा तसेच पुरवणी परीक्षा लवकर घेवून त्याचा निकाल लवकर जाहीर करणे, या बाबींचा सारासार विचार करता सन 2025 ची फेब्रुवारी-मार्चमध्ये घेण्यात येणारी ( इ.12 वी ) व ( इ. 10 वी ) ची परीक्षा नेहमीपेक्षा 8 ते 10 दिवस आधी आयोजित करण्याचा मंडळाचा मानस असून त्याअनुषंगाने लेखी, प्रात्यक्षिक व इतर परीक्षा पुढील तारखांना घेण्यात येणार असल्याचे बोर्डाकडून प्रसिद्धीपत्रकाद्वारे नमूद करण्यात आहे आहे. 

उच्च माध्यमिक प्रमाणपत्र ( इयत्ता 12 वी ) परीक्षा -             -  लेखी व प्रात्यक्षिक परीक्षा मंगळवार 11 फेब्रुवारी ते 18  मार्च 2025                                                                    - प्रात्यक्षिक, श्रेणी, तोंडी परीक्षा व अंतर्गत मूल्यमापन - शुकवार 24 जानेवारी ते सोमवार 10 फेब्रुवारी 2025 या कालावधीत पार पडणार.

माध्यमिक शालान्त प्रमाणपत्र ( इयत्ता 10 वी )                    - लेखी परीक्षा शुक्रवार 21 फेब्रुवारी ते सोमवार 17 मार्च 2025                                                                         - प्रात्यक्षिक, श्रेणी, तोंडी परीक्षा व अंतर्गत मूल्यमापन - सोमवार 3 फेब्रुवारी ते गुरूवार 20 फेब्रुवारी 2025 या कालावधीत पार पडणार.